Dä Rick dä fuhr mem Auto
Die Ampel stund op Jrön
Vun räähts do kom en Taxi
Dä Rick dä krääht ne Fön
Ne laude Knall, ne dumpfe Schlaach
Sing Auto dat wor Schrott
Doch op däm en et Spidol
Wor dä Rick ad nit mieh kott
Hück es dä eetste Daach
vum Ress vun mingem Levve.
Keine Bleck zoröck,
ich luur noh vürre.
Et Lävve is ze koot
für Ärjer un für Woot
Em Eng kütt doch fass alles in et Lot
Als hä us dä ReHa kom,
Do fuhr hä flöck noh Hus.
Doch vür dr Dür vun singem Hus
stund dä SUV vom Fuss.
De Düür erin, de Trapp erop –
dä Rick trof bahl dä Schlach.
Dä Fuss met singer Frau em Bett.
Doch dä Rick hätt sich jedaach …
Hück es dä eetste Daach
vum Ress vun mingem Levve.
Keine Bleck zoröck,
ich luur noh vürre.
Et Lävve is ze koot
für Ärjer un für Woot
Em Eng kütt doch fass alles in et Lot
Als Rick daachs drop zor Firma jing,
mooht hä tirek nohm Boss.
Krääht sing Papiere en de Häng,
sing Arbeid wor hä loss.
Et Konto leer,
die Frau wor fott –
doch Rick saaht: „Leeven Jott!
Dann fang ich ad jet Neues aan.
Mich kritt Ehr nit kapott.“
Hück es dä eetste Daach
vum Ress vun mingem Levve.
Keine Bleck zoröck,
ich luur noh vürre.
Et Lävve is ze koot
für Ärjer un für Woot
Em Eng kütt doch fass alles in et Lot
Un dat ze wisse, dat deiht einfach joot
Un dat ze wisse, dat deiht einfach joot
dat ze wisse, dat deiht einfach joot
Kütt
Teks: Harald »De Plaat« von Bonn
