Bärte

Teks: Christoph »Buchemsche« Weyer

Als kleine Fetz wullt ich ne Jroße weede
Ene Hühn met enem lange Baat
Die mieste Zick daht mich dat janz schön quäle
Die Bäckche blieven jlatt un zaat

Bärte, Bärte, Hey hey hey
Em Jeseech die lange Fluse
Bärte, Bärte, Hey hey hey
Schläch beim Esse, jot beim schmuse

Dem Süper Engel, Millowitsch, denne wor schon lange klor
Wer jet op sich hält dräht Ovverleppehoor
Och die lecker Mädche bütze leever met
Jlattrasiert Jeseesch – Nä, dat wulle mer nit

Dä Zwirbelleppereiter – och Krautmacher jenannt
es nit nor huh erotisch – sondern uch charmant
Jeseechspullover hält dich och em Winter lecker wärm
Un su en staatse Schenkelbösch — dat han die Fraue jään

Bärte, Bärte, Hey hey hey

Bärte, Bärte, Hey hey hey

Su jov mer minge Pap ad fröh ne essenzielle Rat
För Fraue zo verführe, bruchste ene Baat
su stund ich vür dem Speejel un met Aach un Kraach
scherte ich verjeblich die nit vorhandne Praach

In dä Hoffnung dat er in Erfüllung jeiht, ming Draum
doch alles wat do wachse wullt, wor nor ne dünne Flaum
Noh dä Schmach all die lange Johr
Spross do letztendlich dat aller eetze Hoor

Bärte, Bärte, Hey hey hey
Bärte, Bärte, Hey hey hey
Bärte, Bärte, Hey hey hey
Bärte, Bärte, Hey hey hey

Jetz ben ich jroß un han ne decke Baat
Doch Düüvelsdriss, wat es dann dat – do hinge wähß die Plaat

Bärte, Bärte
un hinge wähß die Plaat
dat es doch zom verwiefele
jetz han ich dä Salat

Bärte, Bärte
han su lang drop jewaat
Em Jeseech do wuchert et
un bovven weed jespaat

Bärte, Bärte
Dat mäht mich ad malad
am Hingerkopp do han ich baal
en Kneeschiev parat

Bärte

Text: Christoph »Buchemsche« Weyer

Kütt